UMEAK KORRIKA ETA SALTOKA, GOZATZEN

Donostiako Bulebarrean haur andana biltzen da goizero udaletxearen alboan jarritako puzgarrietan gozatzeko. Han ez da inor geratzen: korrika, saltoka, algaraka... Haurren gozamena begien bistakoa da, eta gurasoen irribarrea ere nabarmena. Hara joan eta txanda eskatu behar da, 11:00etatik aurrera. Kolore eta itxura anitzeko puzgarrietan ibiltzea ez da txantxa energiaz beteriko gaztetxoentzat. Gehienek serio hartzen dute aukera, eta denbora ez dute alferrik galtzen. Piratan barrena edota Gargantuarekin, lau oinetara edo jauzika, berdin dio; kontua da etenik gabe gozatzea. Haien aurpegiei erreparatzea baino ez dago.