Urbieta: «Aurrerapenek erabat aldatu dute irratia»

IRRATIA. Duela bi aste Euskadi Irratiko kirol saileko zuzendari izendatu zuten Txetxu Urbieta (Azpeitia, Gipuzkoa, 1968). Elkarrizketa egin diote Urola Kostako Hitza-n, eta hau adierazi du: «Aurrerantzeko lana orain talde txikian egiten dudana talde osora zabaltzea izango da. Astean kudeaketa lana izango da nagusiki, eta asteburuetan antenako lana egiten jarraituko dut». Elkarrizketa horretan, Urbietak begiratu bat eman die Euskadi Irratian egindako 22 urteei. «Aurrerapen teknologikoek erabat aldatu dute irratia», esan du. «Lehen albisteak gertatu eta hurrengo egunean iristen zitzaizkigun, eta egun zuzenean ikusi eta kontatu ditzakegu. Bitarteko berriek ekarri duten azkartasuna ikaragarria da».