Wikileaks

Wikileaks irabazi asmorik gabeko nazioarteko erakunde bat da. Erakunde horrek, bere webgunearen bitartez (http://www.wikileaks.org/), mundu osoko gobernu eta administrazio publikoen dokumentu eta txosten sekretuak argitaratzen ditu, informazio korapilatsuarekin.

Erakunde horren webgunea 2006ko abenduan argitaratu zen, eta 2007ko uztailean hasi zen elikatzen. Harrezkero, dokumentu eta txosten pribatuen kopurua handituz joan da, eta dagoeneko 1,2 milioi dokumentu sekretu argitaratu ditu. Dokumentu sekretu horien bitartez, gobernuen jokaera ez-zilegiak plazaratu nahi ditu.

Wikileaks izenean wiki erroa egon arren, ez da wiki ohiko bat, zeren eta Internet erabiltzaileek eta irakurleek edukia ezin baitute ez aldatu ez sortu, ez badaukate horretarako baimena.

Wikileaks webgunean oso filtrazio garrantzitsuak plazaratu dira; Irak eta Afganistango gudaren inguruan, adibidez. AEBetako nazioarteko politikari buruzko azken filtrazioek, esaterako, oihartzun handia lortu dute.

Hori dela eta, Wikileaks erakundeak arazo dezente izaten ditu bere webgunea mantendu ahal izateko, eta hainbat boikot eta eraso jaso ditu, bai gobernuen aldetik eta bai informatika enpresa eta hornitzaileen aldetik. Twitterrek zein Facebookek, batzuk aipatzearren, itxiak dituzte proiektu horren aldeko kontuak eta orrialdeak.