ZIBERGELA. Helbidea Pandora entzuteko modua

Lehen ere hitz egin dugu hemen Pandorari buruz. Internet bidezko irrati-zerbitzu bat da Pandora, eta berezitasun nagusi hau du: erabiltzailearen neurrira egindako irratia du, hau da, erabiltzaileak bere musika-zaletasunak adierazten ditu (artista edo abesti baten izena emanez), eta, horren arabera, neurrira egindako musika-irratia sortzen du Pandorak, erabiltzailearen gustuko artista edo abesti horren antzekoak diren abestiekin. Baina lege-arazoak direla eta, zerbitzu hori AEBetara mugatzea erabaki zuten duela hilabete batzuk, eta, harrezkero, ezin da Pandorara konektatu Europatik. Hori gainditzeko, webgune bat sortu dute orain, ordea: GlobalPandora izeneko webgunetik arazorik gabe konekta daiteke Pandoraren zerbitzura munduko edozein tokitatik. Hau da helbidea: http://globalpandora.com