'Zuhaiztatu zaitez' kanpaina hasi dute Donostian

Kanpaina berezi bat hasi dute Kristina Enea Fundazioak eta Donostiako Udalak: Zuhaiztatu zaitez. Hiriko zuhaitz jakin bat aukeratu eta zuhaitz horren aitabitxi edo amabitxi bihurtzeko aukera emango diete donostiarrei. Basoak zaintzeak duen garrantziaz ohartarazteko eta herritarren parte hartzea bultzatzeko helburuarekin antolatu dute.

Kontxa pasealekuko tamarindoren baten, Peñafloridatik atera zituzten sekuoietakoren baten edo hiriko beste edozein zuhaitzen aitabitxi edo amabitxi izan nahi duenak erraza du egitekoa: euro bateko ekarpenaren truke, pertsona, elkarte edo erakunde bakoitzak hiriko zuhaitz bat aukeratuko du. Behin zuhaitza aukeratuta, www.cristinaenea.org webgunean jarri duten fitxa bete beharko du, zuhaitzaren kokaleku zehatza, espeziea, altuera, diametroa, ezaugarri orokorrak eta argazkia gehituta. Aitabitxi eta amabitxi bakoitzak zuhaitzaren bizitzaren berri jakin eta bilakaera jarraitzeko konpromisoa hartuko du.

Ekimenarekin ateratako irabaziak hirian zuhaitz gehiago landatzeko baliatuko dituzte, eta 2013ko otsailean Mendizorrotza magalean zuhaitz autoktonoak landatuko dituztela jakinarazi dute proiektuaren bultzatzaileek.