Arkupe gozotegiak 35 urte daramatza gozogintzan. Santi Urtasunek enpresa martxan jarri zuenetik, familiak hurrengo belaunaldiraino eraman du negozioa. Askotariko produktuak lantzen dituzte: txokolate tabletak, bonboiak, pastak, galletak, pastelak, opilak, moldeko ogia, magdalenak, izozkiak…
Arkuperen espezialitaterik nabarmenena hurrarekin egina da: hur ale osoekin nahastutako txokolatea.
Horrenbeste urte arrakastaz egiteko, sekretu bat du enpresak: txokolatearen prozesu osoaren gaineko kontrola, kakao hazitik hasita. Produkzio guztia enpresan bertan egiten dute, eta horrek bermatzen du txokolatearen kalitatea maila gorenekoa izatea. Kakao hazien aukeraketatik bezeroaren eskuetaraino iritsi arteko bidea egiten dute enpresako langileek.
Kakaoa hainbat herrialdetatik ekartzen dute: Kuba, Ekuador, Venezuela, Madagaskar… Artisau lana egiten dute lehengai horretatik hasita.
Pastak ere aski ezagunak dira, egunero-egunero egin berriak saltzen baitira, gainerako produktu guztiak bezala.
Informazio gehiago bildu nahi izanez gero, bisitatu webgune hau: www.arkupegozotegia.com.
