2007-2010 aldian Gipuzkoan 1.130 milioi euroko iruzurra egon dela atzeman du Gipuzkoako Foru Aldundiak, Pello Gonzalez Ogasun diputatuak gaur esan duenez. "Herrialdean lau urteko tartean inoiz izandako iruzurrik handiena da".
Aldundiaren arabera, 2007ko iruzurra 181,9 milioi eurokoa izan zen, 2008an 335,7 milioikoa, 2009an 294,3koa eta iaz 317,5ekoa.
Gonzalezek adierazi du iruzurraren aurkako plana daramala aldundiak eta orain arte "emaitza onak" izan dituztela, hainbat kasu atzeman dutelako. Azkeneko lau urteetan ustezko delitu fiskaleko 83 espediente jarri dituzte auzitegien eskuetan —81,5 milioi euroko baliokoak—.
Iaz, herritarrek salaketak egiteko telefono zenbakia bat jarri zuen diputazioak, eta Gonzalezek esan du 398 salaketa izan direla. Horietako 52 azterketa fasean daude, 159 datu basera pasatu ditu aldundiak, 129 beste administrazio batzuetara igorri ditu eta 58 artxibatu.
