13 'stock'

Biluztu egin da Edorta Jimenez Stock 13rekin eta burtsan ere, 13 (eta gehiago) stock (akzio, ingelesez) gorritu ziren atzo; Ibex-35 (-%2,58) ez zen salbuespena izan. Thanksgiving izanda ostiral beltza aurrikusi edo ez, danbatekoari buruzko aurretiko espekulazioa bazen, harik eta Dubaiko tsunamiak Mundakako olatua haurren jolas bihurtu zuen arte. Burtsak amiltzea ulergarria da: dirua izan baduenak ez ordaintzeari ekiten badio, zer ez ote du egingo dirurik ez duenak? Sexu gogorra da galdera horri erantzutea eta gorri-gorri gelditu ziren Ibex-35eko tropelean, OHL (+%1,35) ez, beste akzio guztiak. 2.099 milioiren salerosketarekin, %3na pasa jaitsi ziren bi banku handienak, %1,82 Edurnezuri eta, okerrago, %5na pasa Arcelor eta Ferrovial eta %4na pasa Cintra, Iberia eta Sacyr. Repsol-YPFk (-%2,51) ez du Ekialde Hurbileko herriekin negozio zuzen asko, baina soka luzea ekar lezake, konfiantzaren kaltetan, Dubaikoen bekatuak.



Quiron Vizcaya. Sabadell (-%2,85) bankuak 55 milioitan erosi du Quiron Vizcaya ospitale berria. Quiron enpresak kudeatuko duen arren, Sabadell bankuaren higiezinen funtsa izango da beronen jabea eta 20 urterako alokatuko dio Quironi.



Renovables (-%0,92) izan zen atzo gutxien jaitsi zen akzioetako bat. Energia berriztagarrien alorrak, dirulaguntza publikoen gainsarien inguruko zalantza duen arren, energia eskariak behera egindakoan nabarmentzen du bere abantaila ere. Haizeak, kasu.