Murrizketa gehiago egiteko eskatu dio Bruselak Mariano Rajoy Espainiako presidenteari. Datorren urterako aurkeztutako aurrekontuaren zirriborroarekin defizit maila ezingo duela bermatu aurreikusi du Europako Batzordeak.
Aurreikuspenen arabera, Espainiak 2014an barne produktu gordinaren %5,9ko defizita izango du, eta Bruselak %5,8ren azpitik izatea eskatzen dio. Gainera, esan du kalkulu hori arrisku handikoa dela, diru sarreretan jaitsierak egon daitezkeelako.
Gaur lehen aldiz baloratu ditu Europako Batzordeak euroguneko herrialde guztien aurrekontuak, etorkizunean zorraren krisi gehiago saihesteko asmoz. Arau berrien arabera, Bruselak eskumena du ofizialki aurrekontuetan aldaketak egiteko eskatzeko, baina oraingoz ez du exijentzia mailara eraman.
