Eusko Jaurlaritzako Ekonomia eta Ogasun Sailak EAEko ekonomiaren hiruhilabetekaria argitaratu du gaur. Horren barruan 2015. urterako hazkunde aurreikuspenak eguneratu dituela jakinarazi du. Orain artekoekin alderatuz, gorakada nabarmena egin die aurreikuspenei. Hain zuzen ere, Euskal Autonomia Erkidegoko ekonomia aurten %2,3 haziko dela kalkulatu du.
Azken aurreikuspena joan den urteko urrian egin zuen Iñigo Urkulluren gobernuak. Horren arabera, aurten barne produktu gordina %1,7 haztea espero zuen. Sei hilabete geroago, sei hamarren gehiago izango dela ondorioztatu du.
Faktore ezberdinak aipatu ditu Ekonomia eta Ogasun Sailak aldaketa oinarritzeko. Barne eskaera indatzea espero du, batetik. "Familien kontsumoak erritmo bizian egingo du gora", ziurtatu du. Eskaera horretan kontsumo pribatua izango da tiraka egingo duen aldagai nagusia, %2,5eko hazkundearekin.
Eskaintzaren esparruan ere industriak eta zerbitzuak BPGetik tiraka egingo dute. "Ekipamendua berritzeko beharra, enpresen balantze onbideratuak eta kreditua lortzeko erraztasun handiagoa daude goraka horren oinarrian", dio Jaurlaritzak. Eraikuntzak urte arteko tasan hazkunde negatiboa izango du, baina urteko azken hiruhilekoan %0ra iritsiko da. Sektore horretan "suspertzeko zantzuak" sumatu ditu gobernuak.
Datu horien ondorioz enplegu eta langabezia aurreikuspenak ere hobetuko direla uste du Jaurlaritzak. Hala, langabezia tasa, batez beste, %13,7ra jaitsiko dela kalkulatu du, orain arteko %14,9arekin alderatuta. Enplegu kopuruari dagokionez, urtearen joanean %1,6 igoko dela espero du. Gutxi gora behera, 14.000 lanpostu garbi sortuko lirate, kalkulua betetzen bada.
