Cristobal Montoro Espainiako Gobernuko Ogasun eta Administrazio Publikoetarako ministroak iragarri du bihar jakingo dela estatuan 2011 amaieran 5,4 milioi langabe zeudela. Espainiako Estatistika Institutuak emango ditu datuak.
"Espainian bizi diren 47 milioi lagunek konfiantza galtzea dakar datu horrek", adierazi du Montorok, eta gaineratu du gobernuaren zeregina konfiantza hori berreskuratzea eta enplegua sortzea dela. Kongresuan mintzatu da, bere ministerioko batzordearen legealdiko lehen bileran.
Europako Batasuneko 27 herrialdeen artean Espainiako Estatuan dago langabeziarik handiena: %22-%23koa. Bihar jakingo da kopuru zehatza.
