Markel Olano EAJko Gipuzkoako zerrendaburuak "ekonomiaren sustapena baztertzea" egotzi dio egungo aldundiari, eta uste du Bildu "izugarri urrun" egon dela enpresari eta langileengandik: "Ez du enpresaren alde egin".
Araban eta Bizkaian indarrean dagoen Ondarearen Zergarekin harmonizatuko du EAJk Gipuzkoakoa, foru gobernura iritsiz gero. Olanoren iritziz, fortuna handien gaineko zergak kalte egiten die "enplegua eta jarduera sendotzeko helburuarekin irabaziak berriro inbertitzearen alde egiten dutenei".
Horrez gain, konpromisoa adierazi du zerga politika "ekonomia-jarduera eta enplegua laguntzera" bideratzeko, eta ez "bakarrik dirua-biltzeko tresna izatera".
Maiatzaren 24an izango dira udal eta foru hauteskundeak. Sei proposamen aurkeztuko ditu EAJk, eta urtarrilaren 31n jakinarazi zuen lehena: errauste planta eraikiko du bozak irabazten baditu.
57 milioi euro, lehen kanpainan
Fortuna handien gaineko zergak polemika eragin zuen Gipuzkoan, zergapekoen ihesa eragingo zuelakoan. Zerga pagatu behar zuten 49 lagun joan ziren Gipuzkoatik, lehen kanpainako datuen arabera; Bizkaitik baino 11 gutxiago. Lehen kanpaina horretan, 2013an, 57 milioi euro bildu zituen foru gobernuak; 2012an baino %47 gehiago.
