Adegiren «harrokeriari» eta jarrera «probokatzaileari» erantzuteko garaia dela erabaki dute Gipuzkoako metalgintzako sindikatuek. Lan hitzarmen berrirako negoziazioaren porrotaren erantzule bakarra izatea leporatu diote patronalari UGTk, CCOOk, ELAk eta LABek, «ez baitu inolako proposamen aurrerakoirik egin».
Patronalak proposatuko lan eskubideen «murrizketa basatia» salatzeko protesta antolatu zuten atzo Donostian, Adegiren egoitzaren aurrean. Hitzarmen justu baten alde, Gipuzkoako metala borrokan lemapean, lau sindikatuetako ehunka ordezkari bildu ziren «errealitatetik at» dauden eskakizunen aurka, eta lan baldintza duinak aldarrikatzeko.
Elkarretaratzean gogorarazi dutenez, metaleko enpresek proposatutakoa «erabat atzerakoia da»: soldatak izoztea, lanaldia 58 ordutan igotzea, malgutasuna urteroko 65 orduetatik 120ra igarotzea, antzinatasun gehigarria kentzea eta langileen ordezkarien eskubideak murriztea, besteak beste.
UGTk, LABek, CCOOk eta ELAk orain arte lortutako eskubideei uko egiteko asmorik ez dutela ziurtatu dute eta, borrokaren bidez, Adegi metalgintzarako «hitzarmen duin eta justu bat negoziatzera behartuko» dutela ohartarazi dute.
Batasun sindikala hautsi
Atzoko protesta negoziazio mahaia utzi zuten lau sindikatuek egin zuten arren, CCOOko Jokin Cruzek patronalarekin berriz biltzeko asmoa agertu du, bere sindikatuko ordezkariek hala eskatu diotelako. LABek, aldiz, asmo horren kontra egin du. CCOOri gogorarazi dio mahaia utzi zutenetik Adegiren jarrera ez dela ezertan aldatu.
Adegi hitzarmen duin bat negoziatzera «behartuko» dutela diote sindikatuek
UGT, CCOO, LAB eta ELAko ehunka lagunek patronalaren egoitzan deitutako protestan parte hartu dute
Iruzkinak
Ez dago iruzkinik
Ordenatu
