Adegi Gipuzkoako enpresarien elkarteak eta ELA, LAB, CCOO eta UGT sindikatuek bertan behera utzi dute gaur Gipuzkoako metalgintzako hitzarmenaren negoziazioa, akordiorik egin ez dutela eta. Ez dute zehaztu noiz arte utzi dituzten negoziazioak.
Adegik ohartarazi du sindikatuek lan erreforma ez aplikatzeko eskatzen jarraitzen badute hitzarmena "hilda" geratuko dela. Patronalak dio sindikatuen nahi horrek eraman dituela "irtenbiderik gabeko kalezulora".
Adegik uste du ez duela "zentzurik" enpresek lan erreformak ematen dituen "aukerak" ez erabiltzeak.
ELA sindikatuak ohar baten bidez adierazi du patronala dela negoziazioari irtenbiderik ematen ez diona, eta haren helburua lan erreformaren "ondorio negatiboak" sartzea dela leporatu dio.
LABek "kezkagarritzat" jo du egoera; "batik bat, patronala lan erreformaren alde eta Gipuzkoako langileok urteetan lortu ditugun eskubideak murriztu nahian dabilela ikusirik", esan du.
