Datu txarrak iragarpenak gainditu ditu: AEBetako Merkataritza Departamentuak urtarrilaren amaieran esan zuen jaitsiera %3,8koa izango zela; analistek, berriz, %5,4koa espero zuten. Eta %6,2ko datua ez da behin betikoa. Martxoan berraztertuko dute.
Urte osoko datua aintzat hartuz gero, AEBetako ekonomia %1,1 hazi zen iaz. Gobernuak %1,2ko jaitsiera aurreikusi du 2009rako.
Kontsumoaren jaitsierak ekonomiako adierazle nagusiak jaistea eragin du. Aintzat hartu behar da kontsumoa dela AEBetako ekonomiaren %70, eta 2008a azken 28 urteetako maila apalenean amaitu zuela.
EBn prezioak behera
Europako Batasunean (EB) langabezia handitzen hari da, herrialde batzuetan besteetan baino gehiago. Langabezia tasa %9tik %14,8ra pasatu da Espainian iazko urtarriletik aurtengora. Bera da langabezia tasa handiena duen EBko herrialdea. Batez bestekoetatik urrun dago, EBkoa %7,6koa baita, eta euroaren eremukoa %8,2koa. Proportzioan Espainiak du emakume eta gazte gehien langabezian: %15,6 eta %30,4, hurrenez hurren.
Urtarrilean 386.000 langabe gehiago zeuden EBn. Iaz 2,1 milioi gehiago.
Hala ere, bada datu onik Europako ekonomian: prezioak jaisten ari dira. Iazko abendutik urtarrilera %0,8 jaitsi ziren euroaren eremuan, eta inflazioa %1,1ekoa izan zen. EBn jaitsiera %0,6koa eta inflazioa %1,7koa izan ziren. EBn bi herrialdetan bakarrik igo ziren prezioak, %0,3: Eslovakian eta Finlandian.
Espainian urte arteko kontsumo prezioen indize harmonizatua %0,7koa da, 1997an neurtzen hasi zirenetik bajuena. Zazpi hilabetez jarraian jaitsi da. Iazko abendutik urtarrilera hamarren bat.
Europa
Herrialdea Langabezia InflazioaAlemania. % 7,3. % 0,9
Austria. % 4,0. % 1,2
Belgika. % 7,2. % 2,1
Bulgaria. % 5,3. % 6,0
Danimarka. % 4,3. % 1,7
Espainia. % 14,8. % 0,8
Finlandia. % 6,6. % 2,5
Frantzia. % 8,3. % 0,8
Herbehereak. % 2,8. % 1,7
Hungaria. % 8,6. % 2,4
Irlanda. % 8,8. % 1,1
Letonia. % 12,3. % 9,7
Polonia. % 6,7. % 3,1
Portugal. % 8,1. % 0,1
Suedia. % 7,4. % 2,0
Txekia. % 5,0. % 1,4
