Itziarko WECeko langileen batzarrak atzo batzordearen eta zuzendaritzaren artean lortutako akordiorako oinarria berretsi egin du gaur. Lantalde osoaren kaleratzea ekiditea lortu dute, beraz. Enpresak mahai gainean jarri zituen lantegiaren itxiera eta 50 beharginen kaleratzea, 20 eguneko kalteordainarekin, urtebeteko mugarekin gainera. Alegia, lan erreformak finkatzen duen gutxienekoa.
Greba mugagabean zegoen lantaldea aspaldian erabaki horren aurka," eta borroka dela medio", 45 eguneko kalteordaina ordaintzera behartzen du enpresa orain lortutako akordioak, ELA sindikatuak jakitera eman duenez. Horrekin batera, Wind Energy Casting taldearen beste lantegiren batera lekualdatzea eskatzeko aukera ere zabalik dute beharginek.
Halaber, lantalde osoari lanposturen bat eskaintzeko konpromisoa zehazten du adostutakoak, baldin eta egungo instalazioetan industria jarduera berreskuratzen bada 2018ko Abenduaren 31 baino lehen. ELA sindikatuak dio akordioa ahalbidetu duela "WECeko langileon ahalegina eta borrokak".
