Bizkaiko metalgintzako gatazkak udako etenaren aurreko egoera berean jarraitzen du: ez atzera eta ez aurrera. Sindikatu eta patronala 22. aldiz eseri dira mahaiaren bueltan, gaur, eta akordiorik gabe altxatu dira bertatik. FVEMek sindikatuei leporatu die euren jarreran aurrerapausorik ez egitea; ELAk, LABek, CCOOk, UGTk, ESK-k, CGTk, USOk eta CNTk, berriz, maiatzean egin zituzten proposameneko puntu garrantzitsuei buruz ez eztabaidatzea patronalari. Alegia, akordio ezaren errua elkarri aurpegiratu diotela alde biek. Gauzak horrela, sindikatuek mobilizazio agendari eutsiko diote, eta sektoreko itun «duin bat» lortzeko irailaren 30etik urriaren 4ra arte deitua zuten greba berretsi dute.
Ez dirudi, beraz, gatazka berehalakoan konponduko denik. Dena den, sindikatuek onartu dute FVEMek uda aurreko jarrera apur bat aldatu duela. Azken bileran %4,15eko igoera proposatzen zuen patronalak, eta horrez gain, itunetik gorago dauden soldatak bermatzeko bermea ere eskaini die. Edozein modutan, sindikatuek eskatzen dituzten puntu batzuei ez diela erantzun aurpegiratu diote: subrogatzeari, behin-behinekotasunari, eta aldi baterako lanpostuen inguruko proposamenik ez zuen proposatu FVEMek.
Zortzi sindikatuek Bilbon egin duten agerraldi bateratuan, bestalde, lan osasunaren eta berdintasunaren inguruan patronalak aurkeztu zien txostena ere kritikatu dute. Bi arlo horiei buruzko txosten bana aurkeztu die patronalak, baina «azalekoak» zirela uste dute, eta ez dutela proposamenik jartzen mahai gainean. «Arlo horretan jarduteko asmo oneko adierazpen sorta bat besterik ez dira txosten horiek».
Hilaren 18an dute hurrengo bilera
Sindikatuek agerraldia egin aurretik eman du iritzia FVEMek, ohar baten bidez. Bileraren porrota mahaiaren beste aldeari egotzi dio patronalak, haren ustez, langileen ordezkariek ez dutelako euren jarrera aldatu maiatzean plataforma bateratu bat osatu zutenetik. Mahai negoziatzailean dauden lau sindikatu nagusiek osatu zuten plataforma hori —ELAk, LABek, CCOOk eta UGTk—, baina ondoren gainerako laurak batu dira hitzarmenaren aldeko borrokara. Patronalak jarrera malgutzeko eskatu die, era horretan «denentzako itun duin bat adosteko». Hilaren 18an dute hurrengo bilera.
Mobilizazio gehiago
Irailaren amaieran aste osoko lanuztea egingo dute Bizkaiko metaleko zortzi sindikatuek, baina aurrez ekainean eta uztailean beste bost egunez egin zuten greba. Deitzaileen arabera, jarraipen handia izan zuen, eta Bilbon manifestazio jendetsuak egin zituzten.
Udako etenaren aurreko grebetan Haizea Wind enpresak egin zuen «jazarpen sindikala» salatzeko elkarretaratzea egingo dute etzi sindikatuek, Bilboko Portuaren sarreran.
Irailaren 21ean, bestalde, Bilbon manifestazio bat egingo dute Euskadi plazatik Arriagaraino sektoreko gatazka sozializatzeko asmoarekin.
