Merkatu batzuen bilakaera uste baino okerragoa izaten ari dela argudiatuta, doiketa neurriak "azkartu" egingo ditu Frantziako Alstom taldeak. 1.300 lanpostu murriztuko dituela esan du Patrick Kron presidenteak. Ez du zehaztu kaleratzeak zein herrialdetan egingo dituen, "gehienbat Europan" soilik esan du. 22 herrialdetan ditu lantegiak Alstomek, Euskal Herrian hiru: Bilbon, Trapagaranen eta Buñuelen.
Aurrerantzean jende gehiago botatzea ere ez du baztertu. "Gure industria gaitasuna egokituko dugu behar denean eta behar den tokian, gure beharren erritmoaren arabera". Balizko aukera horri buruz ez duela xehetasun gehiagorik emango azaldu du, aurretik langileen ordezkariekin hitz egin behar duelako.
Adierazpenak apiriletik urrira bitartean izandako emaitzei buruz egindako aurkezpenean egin ditu Kronek. Taldeak 375 milioi euro eskuratu ditu tarte horretan, 2012ko tarte berean baino %3 gutxiago.
