Carcobak gaur goizean Eusko Legebiltzarrean nabarmendu du funts bat sortu beharra dagoela amiantoaren biktimei ordaina emateko, eta, haren arabera, Estatuak finantzatu beharko luke funts hori.
Gaur goizean bilera egin dute Gasteizen, amiantoaren biktimen egoera eta konpentsazio funts baten sorrera aztertzeko. Carcobak gogorarazi du hainbat herrialdek dagoeneko badutela funts hori —tartean daude Erresuma Batua, Frantzia, Italia, Alemania eta Australia—. Martxo amaieran ELA, CCOO eta LAB sindikatuek funtsa sortzeko eskaera egin zuten.
Carcobak salatu du Espainian ez dela "euro bakar bat ere" jartzen amiantoak eragindako gaixotasunak ikertzeko, eta ohartarazi du kaltetutakoak "aberatsak" izango balira egoera bestelakoa izango litzatekeela.
Carcobaren ustez, "pandemia bat da". "Urtero munduan ehun mila lagun baino gehiago hiltzen dituen mineral batek eragindako genozidio ekonomiko bat da", esan du. OME Osasunaren Mundu Erakundearen datuak baliatu ditu horretarako.
