«Erregulazio eskaera batek ez du esan nahi festa egun batzuk izatea edo oporretan egotea», azaldu du Santi Diaz de Espada LABeko ordezkariak. Araban, hain zuzen ere, irailetik aurrera beste dosier olde bat iritsi dela salatu zuen Diaz de Espadak, baldintza okerragoekin. «Luzeagoak dira, soldatak osatzeko diru gutxi ematen ari dira, eta, kasu askotan, kaleratzeak bilatzen dituzte». Eragindako langileen kopurua ere handitzen ari da enpresa batzuetan. Hegal, Moasa, Mercedes, Cavaca, Kemen eta Condesa Fabril dosierrekin daude.
Eusko Jaurlaritzak adierazi du erregulazioen erritmoa moteldu egin dela, eta 13.000 langile baino gehiago lantokietara itzuli direla. LABen ustez, ordea, herrialdeko ekonomian ez dago inolako kimu berderik. Hain zuzen ere, 19.000 langabe baino gehiago daude, eta Lehiaketa Legearen ezarpena eta itxiera patronalak «ugaritzen» ari direla nabarmendu du.
Lehenbiziko mobilizazioa gaur goizean izango da. 11:30ean elkarretaratzea egingo dute Posta plazan, SEA patronalaren egoitzaren aurrean. Ondoren, manifestazioa egingo dute administrazio publikoen egoitzen paretik, eta amaiera Lan Ordezkaritzaren aurrean izango da, Samaniego kalean. «Administrazioek beti enpresen mesederako egiten ari diren lana salatu, eta politiketan benetako aldaketa bat eskatuko dugu», argitu du sindikatuak.
Hasiera batean, mobilizazioak bi astean behin egiteko aukera aztertzen ari dira. Ostirala aukeratu dute, erregulazio bakoitzak berezitasunak dituen arren, enpresa asko egun horretan geldirik daudelako. Edonola ere, lantoki bakoitzean ematen ari diren protestak osatzeko asmoa dutela azaldu du LABek, ez ordezkatzeko.
Kaleratzeak Pasaian
Arabatik kanpo ere krisiaren ondorioek ez dute etenik. Esaterako, Pasaiako Sobrinos de Manuel Camara enpresako zuzendaritzak hamabost langile kaleratzeko asmoa iragarri du. Portuan ari den konpainia kontsignatario eta zamaketari horren egoera azaltzeko prentsaurrekora deitu du gaur langile batzordeak.
Bien bitartean, Gamesak Azkoienen (Nafarroa) duen lantokiaren itxieraren ondorioz, hainbat langile lekualdatuko dituzte, eta aurretik zituzten baldintzak ez aldatzeko eskatu dio CCOOk enpresari. Guztira, 40 dira, erdiak Soriara bidaliko dituzte, beste hamar Tuterara eta gainerakoak Nafarroako beste lantegi batzuetan banatuko dituzte. CCOOren arabera, diru galerak izango dituzte lantokiz aldatzen badira.
