Arcelor Mittaleko zuzendaritzak eta Zumarragako lantegiko langileek bigarren bilera egin dute gaur, eta enpresak lantegia ixteko asmoarekin jarraitzen duela jakinarazi die. Langileek, berriz, lantegia bideragarria dela eta enplegu osoa berma daitekeela esan dute, eta mobilizazioak iragarri dituzte hori defendatzeko, astearterako. Hurrengo bilera biharamunean egingo dute. Gaur bost orduz elkartu dira: 16:30 inguruan atera da langile batzordea bileratik.
Bilerara sartu aurretik Mikel Serrano alkatearekin egon dira langileak, bertara joan baita elkartasuna azaltzera. Han esan du, hark ere, Zumarragako lantegia bideragarria dela, eta bihar azken ekarpenak egingo dizkiotela Eusko Jaurlaritzaren proposamenari. Enpresa bideragarri egiteko, jarduera dibertsifikatzea eta inbertsioak egitea behar dela uste du.
Joan den astean hiru saiakera antzu egin ostean, astelehenean bildu ziren lehen aldiz altzairutegiko bi aldeak, baina gutxirako balio izan zuen batzarrak. Zuzendaritzak itxiera partziala arrazoitzeko txosten tekniko-juridikoa aurkeztuko zuela uste zuten langileek, baina ez zuen inolako dokumenturik jarri mahai gainean. Horrela, beharginen lekualdatzeak negoziatzeko hamabost eguneko kontsulta epea atzo martxan ez jartzeko eskatu zion langile batzordeak, eta zuzendaritzak onartu egin zuen. Negoziazioen ordularia ez piztea izan zen, hortaz, bileraren uzta bakarra.
