Argentinak iragarri du akordioa egin duela bere zorraren hartzekodunekin, eta horren ordainketa atzeratzea lortu duela, gehienez 2038. urtera arte. Argentinak 65.000 milioi dolarreko zorra du (58.000 milioi euro inguru) funts handien hiru talderekin, haien artean Black Rock ezaguna. Maiatzaren 22an amaitu zen ados jartzeko epea, eta ordutik negoziatzen aritu dira.
Buenos Airesko gobernuak gaur jakinarazi duenez, akordio bat egin dute eta abuztuaren 24an sinatuko dute. Horren arabera, 2005etik 2010era jaulkitako bonuak eta 2016tik aurrerakoak beste bonu batzuekin ordezkatuko dituzte, eta 2029an, 2030ean eta 2038an iraungiko dira.
Zor duen dolar bakoitzagatik 54,8 zentimo ordainduko ditu Argentinak datozen bi hamarkadetan. Akordio hori dela eta, Buenos Airesek Nazioarteko Diru Funtsaren esku hartzea saihestu du. Herrialdea atzeraldian dago 2018. urtetik.
