Bi astez, Aste Santuko oporrak tarteko, ospitaleetako oheak ixteko aprobetxatu duela jakinarazi du ELA sindikatuak. Guztira, 619 ohe itxi dituela kalkulatu du, zazpi ospitaletan egindako zenbaketan. "Ohiko langileak ez ordezkatzeko obsesioa du, laguntza beharrak kontuan hartu gabe, eta dirua aurrezteko helburuarekin".
Sindikatuaren arabera, opor garaietan errepikatu egiten da fenomenoa. "Badirudi herritarrek eta oporretan hona etortzen direnek ez dutela gaixotzeko eskubiderik edo ezin direla erabili Osakidetzaren instalazioak bi asteotako lanegunetan". Neguan, adibidez, langileak ez ordezkatzeak larrialdi zerbitzuak saturatzea eta gaixoak korridoreetan geratzea dakarrela salatu du sindikatuak.
Horregatik, Osakidetzari lana ez suntsitzeko eskatu dio batetik, eta langile guztiak ordezkatzeko, bestetik; gaixotzen direnean zein atsedenerako eskubidea baliatzen dutenean. "Ez da posible gizarteak bere gain hartu behar izatea Osakidetzaren murrizketen ondorioak, kalitate okerragoko zerbitzuak jasoz".
