Nafarroako Gobernuak jakinarazi duenez, irailaren 26ko greba orokorraren eguneko gertakariengatik aste honetan atxilotutako sei lagunei desordena publikoa eta atentatua leporatu zaie. Gobernuak bere oharrean dio greba eguneko "erasoetan eta kalteetan" nahastuta daudela.
Atxilotuetako seitik bostek 19 eta 35 urte bitartean dituzte; bestea adingabea da. Iruñeko, Garesko, Leitzako eta Sarrigurengo bizilagunak dira. Aste honetan atxilotu dituzte, gehienak asteartean.
Horiez gain, Lizarrako eta Aiegiko beste bi lagunei "erresistentzia larria" ere leporatu diete. Horiek ez dituzte atxilotu baina auzipetu egin dituzte eta deklaratzera joan behar izan dute.
