Bankako XXIII. Hitzarmenaren negoziazioa “itzulera gabeko puntuan” dagoela salatu zuen ELAk, atzo goizean Bilboko Plaza Biribilaren aurrean egindako elkarretaratzean. Banka Hitzarmena: Beste lapurreta bat lelopean bildu dira sindikatuko kideak. Azken hilabeteetan Madrilen egindako bileretan Espainiako sindikatu nagusiek erakutsi duten jarrera ere kritikatu du, “baldintza hobeagoen alde borrokatu ordez, ahalik eta gutxien galtzeko prest” agertu direlako. “Gaitzetan txikiena estrategia hartzen badugu, eta hitzarmenaren zuzentasunari eta unibertsaltasunari uko egiten badiegu, ELAk ez du bere sinadura jarriko”, argitu du.
Langileen antzinatasuna kentzea, etekinen ordainsariak kentzea, lekualdatze dietak kentzea eta langile hasiberriei gutxiago ordaintzea egotzi dio ELAk Espainiako Bankuen Elkarteari. “EBEk nahi duen hitzarmena beste lapurreta bat da”. Horren aurrean, “bide bakarra ekintza sindikala” dela nabarmendu du. Langileen baldintzek okerrera egin dutela eta “Espainiako banku handien” etekinak, berriz, goraka doazela azaldu du.
