Antonio Basagoiti EAEko PPko presidenteak erkidegoko foru aldundiei ohartarazi die amnistia fiskala baztertzen badute iruzurgile fiskalen dirua beste leku batean izango dela eta ez Araban, Bizkaian eta Gipuzkoan. "Burgosen, Castro Urdialesen edo [Espainiako] Estatuko beste toki batzuetan egongo da".
Espainiako Gobernuak azaroaren 30era arte nahi adina diru beltz zuritzeko aukera emango die iruzurgile fiskalei. Trukean, legeztatu nahi duten ondasunen edo diruaren %10 ordaindu beharko diote zergapekoek Ogasunari.
Basagoitik uste du neurri hori ez dela amnistia fiskala, "baizik eta diru hori sisteman geratzea da, eta erakundeen diru sarrerak handitzea gizartekintza eta politika ekonomikorako. Hemen, ordea, aldundiak %10 hori gabe geratuko dira".
EAEko PPko buruaren arabera, ez da harritzekoa izan Javier de Andres (PP) Arabako ahaldun nagusia gobernuaren egitasmoaren aurka azaldu izana. "PPko kargua baino lehen arabarren ordezkaria da. PP ez da alderdi estalinista edo sekta bat".
