BBVAk 624 milioi euroren irabazi garbiak lortu ditu urtarriletik martxora, iazko epe berean baino %64 gutxiago. Orduan izandako aparteko sarrerak ez ditu izan aurten, eta euroarekiko tasa aldaketak ere ez dio mesederik egin bankuari. Kreditua lortzea zaila dela esaten da une honetan; BBVAren sail horri begiratzea baino ez dago ustea berresteko, %6,1 mailegu gutxiago eman baititu urteko lehen hiruhilekoan (349.746 milioi). Gordailuek, ordea, gora egin dute, %1,7 (309.817 milioi). Bankuak CNMV merkatu arautzaileari esan dionez, "arrisku indikatzaileek hobekuntza seinale argiak erakusten dituzte". Izan ere, berankortasunak behera egin du bankuan "2011tik estreinakoz".
Iberdrola, nazioarteari begira
Eneregiaren alorrean, berriz, Iberdrolak %8,4 igo ditu bere irabaziak azken hiru hilebeteotan, aurreko urteko aro berarekin alderatuta (953 milioi euro). Hiru zutabe ditu emaitzen hobekuntzak: nazioartean lortutako zenbakiak, konpainiak EDPn zuen parte hartzearen salmenta eta Brasilen zituen hainbat aktiboren salmenta. Iberdrolak CNMVri jakinarazi dionez, desinbertsio horiek eta aparteko sarrerak alde batera utzita, %4,6 murriztuko lituzke irabazi garbiak (848 milioi euro), "Espainiako neurri arautzaile eta fiskalek eraginda. 105 milioi eskuratu ditu Iberdrolak, EDPren %3,7aren salmentari eta Brasilgo Itapebi Geraçao de Eneregia a Termopernambucoren %22,6aren salmentari esker.
