Beste 1.500 langile kaleratu ditu Fordek, Ingalaterran

Genkeko (Belgika) planta datorren urtean itxiko duela jakinarazi zuen herenegun Ford Europak —4.300 langilek dihardute lantegi horretan—, eta atzo, berriz, esan zuen Ingalaterran beste 1.500 langile kaleratuko dituela. Southampton eta Dagenhameko plantak itxiko ditu, 2013an horiek ere. Ford Europak berregituraketa sakon bati ekin dio, «errentagarria izateko helburuarekin». Zuzendaritzaren erabakiak milaka langileren patua finkatu du Europan. Genkeko ekoizpena Valentziara (Herrialde Katalanak) eramango dute, ekoizpen kostuak merkatzeko xedearekin, besteak beste. Autogintzaren alorrean gogor jotzen ari da krisia, eta gutxi dira neurriak hartu ez dituzten auto etxeak.