Aurrera jarraitzen dute Frantziako Gobernuak bultzatutako lan kodearen erreformaren aurkako protestek. Gaur, Gipuzkoa eta Lapurdi arteko mugan zuten hitzordua sindikatuek, Behobian. Jende andana gerturatu da, tartean, baita CGT, LAB, CCOO sindikatuetako ordezkariak eta lan erreformaren kontrako kolektiboa ere. Denen artean blokeatu egin dute Behobiako zubia, ordu laurdenez. Protestak ez du zirkulazio arazo nabarmenik sortu, Ertzaintzak eta Frantziako Poliziak bideratu baitute trafikoa.
Ondoren, batzarra egin eta Biriatuko ordainlekura abiatu dira, hura ixteko asmoz. 12:00ak inguruan hasita 13:00ak arte blokeatu dute ordainlekua Gipuzkoatik Lapurdirako noranzkoan. Autoei igarotzen utzi diete, baina ez, hala, kamioiei. Peio Dufau CGTko trenbideetako langileak azaldu duenez, ekintzaren bidez asmoa zen Espainiar estatutik Frantzia iparraldera erregaia daramaten kamioiak oztopatzea. Findegiak greban dira Frantzian, hain justu, eta erregaia eskasten ari da gasolindegietan. Ordainlekua blokeatzearen ondorioz, ilara luzeak sortu dira mugan, Lapurdirako noranzkoan.
Kamioiak blokeatzen hasi dira, autoak pasatzen uztea da asmoa @berria@jusquauretraitkpic.twitter.com/mTL1Xi92Ny
— Maddi Ane (@mtxoperena) 2016(e)ko ekainak 1
Ez da Jusqu'au Retrait kolektiboak deituta egiten den antzeko lehen ekintza. Aurretik ere Bokaleko portuko sarrera-irteerak eta Baionako pleitagunea ere itxi dituzte.
Horretaz gain, SNCFko langileek ere greba mugagabea abiatu zuten atzo iluntzean, erreformaren aurka. Haietako hainbatek bat egin dute Behobiako ekintzarekin. Gaur, berriz, sektore gehiago batuko zaizkie; eta biharko manifestazioak iragarri dituzte. 11:00etan eginen dute manifestazio nagusia, Baionako tren geltokitik abiatuta.
