Inoizko aurrekonturik handienak izango ditu Bizkaiko Foru Aldundiak 2020an: 1.283,6 milioi eurokoak. Aurtengo kontuekin alderatuz gero %2,26 haziko da aldundiaren aurrekontua, hau da, 28,4 milioi euro gehiago izango ditu eskura. Kontu horien balorazio positiboa egin du gaur goizeko aurkezpenean Unai Rementeria ahaldun nagusiak: “Ondo gaude, Bizkaia ondo dagoelako; ez da mezu optimista bat, mezu errealista bat baizik”. Baikor azaldu da, eta hori esateko arrazoiak dituela esan du, lurraldeko “ekonomia orekan” dagoelako. 2020rako kontuek, gainera, “Bizkaiak aurrera egitea bermatzen dutela” zehaztu du.
Hala ere, hausnarketa egiteko eskaera egin dio Espainiako Gobernuari, eta gastu mugari eusteak merezi ote duen galdetu. Izan ere, 2012az geroztik Hego Euskal Herriko aldundien eta gobernuen aurrekontuak gehienez %2,8ko hazi daitezke urte batetik bestera. Nahiz eta diru gehiago biltzea aurreikusi. Horregatik egin du galdera hori Rementeriak, ea zenbateraino merezi ote duen muga horri eustea. Izan ere, aurtengo eta hurrengo urteko kontuetan muga hori egongo ez balitz 60 milioi euro gehiago gastatzeko aukera izango zuen aldundiak.
