Gainerako langileen baldintzetara egokitzea da helburua. Bizkaiko Foru Aldundiko egoitzetako garbitzaileak azpikontratatuta daude, eta udaletako langileen baldintzak arautzen dituen Udalhitz akordioan bilduta dagoen soldata baino %6,54 gutxiago jasotzen dute. Horregatik, soldata kopuru hori “ahalik eta azkarren” izatea aldarrikatzen dute, eta ez enpresak herenegun egin zien proposamena. %7,2 handituko lieke soldata, baina 2022. urterako. “Guk hurrengo urterako eskatzen dugu %6,54ko igoera, eta euren proposamenaren arabera %2,4 haziko litzateke”.
Bizkaiko aldundiko langileak 2017ko abenduaren 5etik ari dira mobilizatzen soldata duinagoak aldarrikatzeko, eta “hasierako helburutik gertuago dauden arren”, negoziazio mahaia blokeatzeko bidean egon daitekeela uste du Itsasne Nuñez LABeko kideak. Izan ere, eurek eskatzen dutena baino soldata hazkunde handiagoa mahai gainean jarriz “joko zikina” egin nahi izan dutela uste du, “langileen artean bereizketa lortzeko asmoarekin”. Hilaren 19an daukate enpresarekin hurrengo bilera, eta datorren astean langileekin batzarrak egingo dituztela aurreratu du Nuñezek. Urtea amaitu baino lehen akordioa lortu ahal izateko, ez dute baztertzen lanuzteak ere egitea.
