BURTSA. Aldamioaren atzetik

Bilboko burtsaren eraikina, aurpegi garbiketa medio egunotan aldamio atzean ikusten dugun lez, Espainiako estatuaren kaudimena ere berrikustea erabaki du S&P agentziak, joera negatiboa aurrikusirik. Estatuak jaulkitako zorra garestitzen duen hein berean, bertako enpresena ez du merketuko, bistan denez. Acciona, Cintra edo Sacyrren %5az pasako galera handiez gain, aurpegia garbitu beharraren hauts eta neke hori indize osora zabaldu zen: Gas Natural, Gamesa, BBVA, FCC eta beste mordoxka izan ziren %2na pasako galerekin mugitu zirenak eta, aldamioan maila bat beherago, %3na pasako galerekin Renovables, Repsol eta Abertis izan ziren. %4koan, bakarti, Endesa (-%4,11). Aldamioaren oinarria, 1.650 milioiren salerosketa, ez zen izan behar bezain sendoa. Baina bai Ibex-35 9.200 puntuko langaz azpitik kokatzeko lain. Wall Streeteko galeren aldamioa ere gainezka egotea, konsolagarri eskasa da, noski.



EBZ. EBZren bilera izango da aste honetan eta inflazioa %2ko mailaz azpitik kokatu da. Trichetek ekonomiaren ahulaldi gehigarria espero dutela esan du. Zalantza da orain arteko diruaren merkatzeak nahikotzat jotzen ote dituen. Ziurrenik ez.



Iberia. Iberiak (-%2,84) Madrilgo Barajas aireportuan dituen arazoek hegaldi andana bertan behera uztea eragin dute azken egunotan. Datozen hilabeteetan erregaiaren merkatzeak edo eskari jaitsierak ,eragin gehien nork duen, ikuskizun.