BURTSA. Hi gor; zigor; gorriz

Hi, Trichet, gor agertu hatzaie interes tasen jaitsierak eskatzen dituztenen ahotsei», pentsatu zuen Nicolas Sarkozyk bart. Eurogunean BPGren aurrikuspenak beherantz doaz, KPIrenak gorantz; eta herritar arrunta zigortzen du horrek, akzio azoka gorritzen. Ibex-35 indizean (-%3,11) Tecnicas Reunidas (+%0,49) eta Fenosa (+%0,17) ez beste guztiek jo zuten gorritik: %5na pasa galdu zuten FCC edota Cintra bezalako eraikuntza enpresek, %4na pasa galdu zuten Banesto edo Popular bezalako banku ertainek; eta %3na pasa galdu zuten bi banku handiek; ahobatekotasunez gorritu zen atzo burtsa. Horri AEBetako petrolio erreserben uste gabeko gutxitzea gehituta, ulertzekoa da atzoko zigor latza. Salerosketa, nolanahi den, ez zen 3 mila milioiren langara iritsi. Iraileko aldapa bere pendiza erakusten ari da, pixkanaka. Krisia, hala ere, ez da finantza aldetik konponduko; ekonomia erreala, inbertsioak eta produktibitatea izango ditu gako nagusi.



Arcelor Mittal. Apurtxo bat euskaldunagoa da Arcelor Mittal (-%3,75) atzodanik. Lehengo ekoizpen guneez gain, altzairuaren zentro teknologikoa Bizkaian kokatuko du Indiako Mittal familiak zuzentzen duen altzairugileak. Lanpostu gutxi, baina onak.



FCC. FCCk (-%5,01) 140 milioi bideratu ditu Espainiako Kordoban eguzki energia ekoizten duten parke bi erostera. Espainiako Gobernua energia mota horrek dituen gainsariak kentzea aztertzen ari denez, merkatuak zalantzak agertu ditu eragiketaren gainean.