Hiruna moduluko hamar tranbia, guztiak solairu baxukoak. 42 milioi euroko aurrekontua duen kontratua eskuratu du CAFek AEBetan. Seattle hiriko garraio departamentuak Beasaingo trengilea aukeratu du bere tranbia berriak egiteko. Hamar orain eta etorkizunean beste hamar tranbia eskatzeko aukera jasotzen du CAFek erdietsitako kontratuak. AEBetan bertan, New York estatuko Elmira herrian du lantegia CAFek, eta hantxe egingo ditu tranbia horiek.
Era berean, Beasaingo konpainiak jakinarazi duenez, AEBetako Kansas City hiriko garraio agintaritzak bi tranbia gehiago eskatu dizkio CAFi: horrela, iaztik hirian jada jardunean dabiltzan beste lau tranbiekin sarea osatuko dute Kansas Cityn. Kontratu horri beste 8.5 milioi euro gehitu zaizkio.
