Beste enpresa historiko bat finantzaketa arazoekin. Cegasak konkurtso legearen aurrekora jotzeko asmoa jakinarazi die gaur langileen ordezkariei. Euskal Herrian hiru lantegi ditu — bi Gasteizen eta bat Oñatin —, eta gaur langileen ordezkariekin izandako bileran iragarri du. Sindikatuetako iturriek azaldu dute zuzendaritzak ez duela oraingoz kaleratzerik proposatu.
Konkurtso legearen aurrekoa auzitegian eskatzen badu, hartzekodunekin negoziatzeko tarte bat zabalduko da. Hain zuzen ere, lau hilabeteko epea izango luke Cegasak zor duen dirua itzultzeko baldintzak eta modua hitzartzeko. Azken hilabeteotan egoera zailari buruz ohartarazi die enpresak langileei. Besteak beste, negozioa zatikatzeko aukera aipatu die, galerak dituzten atalak kentzeko. Ez da Cegasak duen lehen krisia. 2008 eta 2011 urteetan enpleguaren erregulazio eskaerak egin zituen. Prozesu horien ondorioz, Cegasaren produktu historikoa, pilak, egiteari utzi zion Arabako hiriburuan. Enpresa historikoa da, eta 1934. urtean sortu zen Oñatin (Gipuzkoa). 30 urte geroago, 1964. urtean, egoitza nagusia Gasteizera lekualdatu zuen.
