Aurreko hilabeteetan gertatu modura, irailean ere Nafarroan hazi dira gehien auto salmentak. Espainiako Trafiko Zuzendaritzaren datuen arabera, 1.339 auto berri saldu dira, iazko irailean baino %54,8 gehiago. Oso gertutik jarraitu dio Bizkaiak, han %54,3 igo baitira salmentak, 2.155 auto matrikulatuta. Gipuzkoan, %35ekoa izan da igoera; eta Araban, %27,6koa. Azken datu hori oso esanguratsua da, joan den hilean %29ko jaitsiera izan baitzuen autoen salmentak Araban.
Azken hilabeteetako datuei esker, apur bat samurtzen ari da 2009an auto merkatua izaten ari den jaitsiera. Maiatzean %25 amiltzen ari zen Hego Euskal Herriko merkatua, baina dagoeneko bere onera etortzen ari dela esan daiteke, jaitsiera %2,6koa baizik ez delako. Aurtengo lehen bederatzi hilabeteetan, guztira, 42.236 auto berri matrikulatu dira.
Nafarroan eta Bizkaian dagoeneko gora egiten ari da merkatua, %7,6 eta %0,3, hurrenez hurren. Beste bi lurraldeetan, ordea, ez. Urtarriletik irailera, iaz garai berean baino %10,1 auto gutxiago saldu dira Araban; eta %11,8 gutxiago Gipuzkoan.
Hego Euskal Herriko marka salduenak Renault eta Citroen dira, 5.370 eta 4.403 autorekin, hurrenez hurren. Haien atzetik daude, Opel (3.843), Ford (3.776), Peugeot , Volkswagen (2.907) eta Seat (2.386).
Laguntzak amaitzear
2000E Planaren barruan, Eusko Jaurlaritzak 7.837 ibilgailu erosteko laguntzak eman ditu dagoeneko. Autoen sektoreari laguntzeko programarentzat aurreikusitakoaren %78,37 erabilita dago. Zehazki, 5.137 ibilgailurentzako diru laguntzak ordaindu ditu, eta gainerakoen izapideak egiten ari dira oraindik. 2000E Planari esker 10.000 ibilgailu berri erosteko laguntzak emango dira Araban, Bizkaian eta Gipuzkoan.
Laguntzak abian jarri zirenetik asko igo dira salmentak Hego Euskal Herrian. Baina laguntza horiek bukatzen direnean zer gertatuko den, hori da auto saltzaileen kezka. Ez dago argi, gainera, behin aurrekontua bukatutakoan administrazioek laguntzak ematen jarraituko duten ala ez.
