EAEk saldo positiboa izan du kanpo merkataritzan, inportazioak amiltzeagatik

Inportazioak ikagarri amiltzeari esker, Arabak, Bizkaiak eta Gipuzkoak kanpo merkataritzako saldo positiboa berreskuratu zuten iaz. Hiru lurraldeetako enpresek inportatu baino 2.328,3 milioi euro gehiagoko ondasunak esportatu zituzten. Estaldura tasa %98,9tik %119ra igo da.

Merkataritzarentzat azken hamarkadetako urterik txarrena izan zen 2009a, %12 jaitsi baitzen, joan den astean Merkataritzaren Munduko Erakundeak jakinarazi zuenez.Euskal Herria ez zen salbuespena izan. Guztira, 14.606 milioi esportatu zituzten enpresek, 2008an baino %26,6 gutxiago. Eustat 1979an datuak biltzen hasi zenetik, 1986an (-%23,3), 1987an(-%3,5) eta 2001ean (-%2,3) baino ez ziren jaitsi esportazioak.

Metalen eta produktu metalikoen esportazioak %39,6 jaitsi ziren, %22,9 material elektrikoak eta %17,4 garraio materialak. Gipuzkoan %22,8 gutxitu ziren, %25,5 Bizkaian eta, Mercedesen eraginez, %32,8 Araban.

Are gehiago gutxitu dira inportazioak: 12.277 milioi eurokoak izan ziren, 2008an baino %38,9 gutxiago. Gipuzkoan %31,5 jaitsi ziren, Bizkaian %40,6 eta Araban %41,3.

Azken hilabeteetan hobera

Inportazioen zati handi bat erregaiari dagokio, ia-ia guztia kanpotik datorrelako. Produktu energetikoak kontuan hartu gabe, are alde handiagoa dago esportazioen eta inportazioen artean: 5.289 milioi eurokoa. Hau da, produktu ez energetikoetan, inportazioak baino %65,4 handiago dira esportazioak.

Urteak aurrera egin ahala, merkataritza suspertu egin da. Urteko azken hiruhilekoan %15 handitu ziren esportazioak aurreko hiruhilekoarekiko, eta %7,6 inportazioak. Edonola ere, 2008ko azken hiruhilekoan baino %11,1 txikiago izan ziren esportazioak, eta %18,3 txikiago inportazioak.