EAJko EBB Euzkadi Buru Batzarrak EAEko zerga sistema erreformatzeko agiria onartu du, "baina neurri zehatzik gabe", hark prentsa ohar baten bidez jakinarazi duenez. "Iruzurraren kontrako borroka", pertsona fisikoen errentaren gaineko zerga, sozietateen gaineko zerga, beste zergak eta harmonizatzeko behar diren jarduera arloak aldatu nahi ditu EBBk. Alderdi jeltzaleak azaldu du agiria "irekia" dela.
Andoni Ortuzar EBBko presidenteak etzi Gasteizen EH Bildu, PSE-EE, PP eta UPDko buruei jeltzaleen agiria aurkeztuko die. Aldi berean, lan metodologia azalduko die; hain zuzen, neurriak "alde anitzeko" bileren bidez baloratzeko batzorde teknikoa osatzea aurreikusten du EAJk.
"Alderdi politikoen arteko oinarrizko adostasun maila" lortu ostean, EAJk proposatuko du ondorioak EAEko Zerga Koordinaziorako Organoari jakinaraztea dagokien erakundeetan.
