Gipuzkoako EAJk goizean jakinarazi du ez diela osoko zuzenketarik aurkeztuko Foru Aldundiaren 2013ko aurrekontuei, nahiz eta Markel Olano batzarkideak duela egun batzuk kontrakoa esan zuen. Olano bera, Joseba Egibar, Maria Eugenia Arrizabalaga eta Eider Mendoza izan dira prentsaurrekoan erabakiaren berri emateko, eta adierazi dute aurrekontuak "onartzeko edo ez eragozteko" hartu dutela neurri hori.
"Egungo krisi larria dela-eta koherentzia" izango du EAJk, haien arabera. Egibarrek azaldu du jokabide horrekin EAJren asmoa ez dela Eusko Legebiltzarrean EH Bilduren eta bien arteko gertutasuna bilatzea.
Zuzenketa partzialak aurkeztuko dizkiote Bilduren gobernuaren egitasmoari. Guztira 91 izango dira, 24 milioi euroren baliokoak. Batez ere, krisiaren aurkako neurriei, gizarte politikei eta hondakinei buruzko proposamenak dira EAJk aurkeztutakoak.
Astelehenean bukatuko da Gipuzkoako 2013ko aurrekontuei zuzenketak aurkezteko epea.
Duela aste batzuk, EAJren EBBk iragarri zuen EAEko erakunde publiko nagusietako aurrekontuak onartzen laguntzeko borondatea izango zuela.
