EBko barne produktuaren %1,5 krisiari aurre egiteko erabiltzea proposatu die Europako Batzordeak estatuei

Egoera larria dela eta nola edo hala aurre egin behar zaiola iritzita, krisia gainditzen saiatzeko 200.000 milioi euro jartzea -EB Europako Batasuneko BPG Barne Produktu Gordinaren %1,5- proposatu die Europako Batzordeak EBko 27 estatuei. Dirutza horretatik 170.000 milioi euro estatu horiek ipini beharko lituzkete, eta gainerakoan EBko funtsetatik eta Inbertsioetarako Europako Bankutik aterako litzateke.

Jose Manuel Durao Barroso Europako Batzordeko presidenteak agertu duenez, krisia handia da, eta ondorioz, erantzun handiak behar ditu: "Proposamena errealista da, estatu batzuek nahi zuten moduan BPGren %1etik behera bideratzea ez baita nahikoa". EBko herrialdeak krisiari aurre egiten elkarrekin eta norabide berean aritzea ezinbestekoa dela azpimarratu du.