EBZ Europako Banku Zentralak "erabat" baztertu du Bankia onbideratzeko Espainiako Gobernuaren plana, Financial Times egunkariaren arabera.
EBZren ustez, Espainiaren planak Europako Batasuneko araudia urra dezake, EBZk ezin baititu gobernuak finantzatu.
Luis de Guindos Espainiako Ekonomia ministroaren arabera, ordea, EBZk ez du Espainiaren plana baztertu, gobernuak ez duelako "planik aurkeztu" bankuaren aurrean.
Atzo, Bankiaren akzioek balioaren %16,25 galdu zuten.
Miguel Angel Fernandez Ordoñez Espainiako Bankuko gobernadoreak atzo iragarri zuen kargua utziko duela ekainaren 10ean, agintaldia amaitu baino hilabete lehenago. Erabakia iragarri aurretik, Mariano Raxoi Espainiako Gobernuko presidentearekin bildu zen.
Azalpen ofizialaren arabera, Fernandez Ordoñezek agurra aurreratu du, ekainaren 11tik aurrera finantza sistemari buruz hartu behar diren erabaki garrantzitsuak gobernadore berriak har ditzan.
