Edesak Basauriko lantegiko makineria salgai duela salatu dute gaur goizean langileek, fabrikaren atarian bi ordu iraun duen elkarretaratze batekin. Bertan izan dira Andoni Busquet Basauriko alkatea eta beste zenbait zinegotzi ere.
Beharginen arabera, aste honetan pertsona talde bat lantegian dabil, termoak fabrikatzeko makineria probatzen, gero tresneria hori erosi ala ez erabakitzeko. Kaleratze espedientearekin dauden beharginek, beste behin, Edesaren eta haren Basauriko lantegiaren jarduerarekin jarraitzeko borondatea agertu dute, eta azaldu dute ez dutela onartzen "lantegia desegitearen, likidezia lortzearen eta beharginak kaleratzearen ideia".
Ildo horretan, inplikazioa eskatu diete konkurtsoko administratzaileari eta Cata Edesaren jabeari, baita Fagor kooperatibari eta euskal erakundeei ere.
