Behargin ohiek Enpleguaren defentsan, Edesa aurrera leloa zuen pankarta zeramatela, Basauriko kaleak zeharkatu ditu manifestazioak. Basauri, Etxebarri, Arrigorriaga eta Galdakaoko alkateek ere parte hartu dute martxan, udal horiek eskatu baitute Edesa berriro martxan jartzeko. Beste ordezkari politiko batzuk ere izan dira; esaterako, PSE-EEko Carlos Totorika eta EH Bilduko Niko Moreno.
Martxa amaieran, agiri bat irakurri dute langileek. Catari galdegin diote berriro zabal dezala Basauriko planta, eta zehaztu diote hain zuzen Bizkaiko herri hori dela jarduerari berrekiteko "leku naturala", argudiatuta horretarako makinak eta teknologia badituztela.
Ohartarazi dute Edesak zituen 230 langileetatik hogei bat ari direla Catan lanean, eta beste 30 inguru kooperatibako beste enpresa batzuetan birkokatu dituela Mondragon Korporazioak.
