Espainiako Parlamentuak lan hitzarmen kolektiboaren erreformaren dekretua bozkatuko du gaur, Gobernuaren kontrol saioa amaitu ostean. Goizetik hainbat protestagile hurbildu dira Parlamentura, baina Poliziak segurtasun neurri zorrotzak ezarri ditu, eta 100 metrora dagoen Neptuno enparantzan bildu dira. Arazorik gabe sartu dira horregatik parlamentariak. Ehunka lagun daude bilduta.
Negoziazio kolektiboaren erreforma onartzen bada, lege proiektu bihurtuko da eta tramitera eramango dute. PSOEk, ordea, ez du bozketa aurrera aterako dela ziurtatuta. Oraingoz soilik euren parlamentarien babesa dauka. EAJk eta CiUk ez dutela babestuko esan dute estatu mailako lan hitzarmenei erkidego mailakoekiko nagusitasuna ematen dien artikulua kentzen ez badute. Artikulu horrek zentralitatearen mesedetan dela salatu du euskal gehiengo sindikalak azken hilabeteetan. Azkenean Madrilen ere ez sindikatuetan ezta patronalean ere ez du babesik lortu PSOEk.
Ezker abertzaleak ohar baten bidez negoziazio kolektiboaren erreformaren aurka biharko euskal gehiengo sindikalak deituriko mobilizazioari bere babesa adierazi dio gaur.