"Kide diren estatuek eta Europako Batasunak berak erreformetan egindako esfortsuak ari dira frutuak ematen", esan du Siim Kallas Europako Batzordeko presienteordeak. Erreforma horiekin jarraitzeko premia aipatu du nolanahi. "Erreforma horiek geratzeak sortuko lukeen konfiantza falta da hazkunde aurreikuspenak ez betetzeko arrisku nagusia".
Udaberriko aurreikuspenetan baikor agertu da Brusela. "Hazkundea irmotu da; defizitak murriztu dira; inbertsioa gehitzen doa; eta enpleguaren egoera hasi da hobetzen".
Hazkundeari dagokioenean, ez ditu gehiegi aldatu aurrez emandako kopuruak. Aurten eurogunea %1,2 haziko dela esan du, eta %1,7 2015ean (aurrez %1,9ko igoera zuen iragarrita); Europako Batasunerako, berriz, %1,6ko hazkundea kalkulatu du2014rako (%1,5 zuen esanda) eta %2koa 2015erako.
Enpleguari dagokioenean, ordea, hobetu ditu neguko iragarpenak. Eurogunerako %11,8ko langabezia tasa iragarri du aurtengo (%12 zuen esanda), eta %11,4koa datorren urterako (11,7 lehen).
Inflazioa %0,8koa izango da aurten. Ohartarazi du inflazio baxuko sasoi luzeegiak arriskuak ekarriko lituzkeela.
