Europa Press berri agentziak PSE-EEko iturriak aipatuta argitaratu duenez, ekonomia eta enplegua suspertzeko akordio batera heldu dira EAJ eta PSE. Iturri horien arabera, gai batzuk adostuta daude bi alderdien artean eta "aurrerapausoak" ematen ari dira beste batzuetan, baina gai batzuk zehazteke daude oraindik: "Akordioak orokorra izan behar du, eta atal guztietan behar du adostasuna".
Besteak beste, langabezia tasa handiena duten herrietan langabeak eta gazteak kontratatzeko funts bat sortzea hitzartu dute. Zerga erreformaren bidez eskuratzea espero duten irabazien %50tik gora funts horretara bideratu nahi dute.
Gastu sozialaren arloan, PSEk beharrezkotzat jo du hezkuntzan, zerbitzu sozialetan eta kalitatean murrizketarik ez egitea. Adostu dute atal horren finantzaketa ez urritzea eta, gutxienez, 2012ko aurrekontuetan jasotakoaren adinakoa izatea.
Negoziazioa, "azken esprintean"
Itxaso Atutxa EAJko Bizkai Buru Batzarreko presidentearen esanetan, bi alderdien arteko negoziazioa "azken esprintean" dago, eta gaineratu du "asko aurreratu" dutela. Datorren astean edo hurrengoan akordioa ixtea espero du Atutxak. Herri Irratian eginiko adierazpenetan, "lasaitasun apur bat" eskatu du Atutxak.
