Atzo iragarri zuen LABek altxatu egingo zela Araba, Bizkai eta Gipuzkoako metalgintzako mahaietatik, "benetako negoziaziorik" ez dagoela argudiatuta. Erabakia beranduegi hartzea leporatu dio ELAk. "Badirudi LAB 2014ko irailean konturatu dela patronalaren lan erreforma inposatzeko nahiaz". Sindikatuaren arabera, "harrigarria" da metaleko patronalaren izaeraz orain jabetzea.
ELAk dio LABek bi urte alferrik galdu dituela, "ez baitie azaldu langileei patronalaren erasoa zenbaterainokoa den". 2012an jarri zuen indarrean Espainiako Gobernuak azken lan erreforma. "LABek orduan konfrontazioa saihestea erabaki zuen".
Era berean, Ainhoa Etxaidek zuzentzen duen sindikatuari egotzi dio Jaurlaritzari "ez duen sinesgarritasuna" ematea. "Arlo publikoko langileen negoziazio kolektiborako eskubidea hankapean hartzen duen Jaurlaritza ezin da metaleko langileentzat inolako esperantza izan". ELAk berretsi du enpresetan borrokatzeko garaia dela.
