Jose Elorrieta ELAko idazkari nagusiaren ustez, "Eusko Jaurlaritzak sindikatuen eta bereziki gehiengo sindikalaren aurka jotzeko plangintza zehatza du, gehiengo hau ez zaiolako erosoa egiten, eta edozein bitarteko erabiltzen ari dira". Juan Jose Ibarretxe Jaurlaritzako lehendakaria jo du "arduradun nagusi" bezala. Bere sindikatuak "Jaurlaritzaren erasoei aurre" egingo diela ohartarazi du Elorrietak. Aurtengo Maiatzaren Leheneko ospakizunak aurkezteko agerraldian egin ditu adierazpenok.
Hain zuzen, azkeneko urteetan bezala, ELAk Bilbon ospatuko du Maiatzaren Lehena. 11:30ean Elorrietak eta Adolfo Muñoz idazkari nagusiaren albokoak hitz egingo dute mitinean, Jesusen Bihotzaren Plazan. Ondoren Bilbon bertan manifestazioa egingo du ELAk, Euskal Herri soziala indartzeko... langileak martxan! lelopean. 14:30ean, berriz, bazkaria Barakaldon (Bizkaia), BEC erakustazokan.
"Erasoak" jaso arren, euskal sindikalismoak "osasun ona" duela azpimarratu du gaur Elorrietak. “Jaurlaritzak enkarguz egindako ikerketa batek Euskal Autonomia Erkidegoan afiliazioa %29koa dela erakutsi du, Espainiako Estatuan eta Europan dutena baino askoz handiagoa”.
Muñozek azaldu du ELA azken urteotan gai izan dela azpi-kontratazioari, soldaten eskala bikoitzari edota prekarietateari aurre egiteko negoziazio kolektiboa egokitzeko orduan. "Ugazabek eta administrazioek bat egiten dute langileen aurka jotzeko orduan", salatu du.
Ekonomia
ELAk uste du Jaurlaritzak "gehiengo sindikalaren aurka jotzeko plangintza" daukala
Sindikatu abertzaleak ohartarazi du haren "erasoei aurre" egingo diela. Bilbon ospatuko du aurten ere Maiatzaren Lehena, 'Euskal Herri soziala indartzeko... langileak martxan!' lelopean.
Iruzkinak
Ez dago iruzkinik
Ordenatu
