Gaur, Emakume Baserritarraren Nazioarteko Egunean, aho batez onartu du Eusko Legebiltzarrak Emakume Baserritarraren Estatutua. Arau berri horren bidez, emakumezkoen eta gizonezkoen arteko parekidetasuna erdietsi nahi da lehen sektorean.
Arantza Tapia sailburuak nabarmendu du gaurkoa egun "pozgarria" dela sektorearentzat, bere irudiko aurrerapauso garrantzitsua eman baita baserrian lan egiten duten emakumeen eskubideen alde. Besteak beste, gizarte segurantzan izena emateko erraztasunak jartzea edota dirulaguntza gehiago izatea ahalbidetuko du esatutuak.
EHNEren kritikak
Legea onartuko zela jakitean, EHNE kritiko mintzatu zen, eta atzera egiteko eskatu zien alderdi politikoei. EHNE sindikatuaren ustez "sakontasun eta ausardia handiagoa" behar du Emakume Baserritarren Estatutuak, "ez baitu emakume nekazari eta abeltzainen langile izaera eta errekonozimendurik lortzen". Amelia Jauregi EHNEko kideak "testu juridiko lotesle bat" eskatu zuen, oraingoak ez duelakoan aukera berdintasunik bermatzen.
