CNA Fagorrek asteon iragarri du Edesa Industrialen Garagartzako lantegian jarduera eten egingo dela "linea berri baten ekoizpena dela-eta, lantegiaren ahalmena merkatura eta aurreikusitako stock-era egokitzeko". Enplegua erregulatzeko espedientearen gutxieneko aplikazioa proposatu dio gaur zuzendaritzak enpresa batzordeari; azaroan soilik aplikatuko litzateke, eta era partzialean, batzordeak azaldu duenez.
Proposamenari ezezkoa erantzun dio batzordeak, "bere baitan ez baitu inolako irtenbiderik proposatzen". Enpresaren etorkizunaren inguruan kezka sortzen dien urrats berria da, gainera, batzordearentzat. "Ez dugu inolako zalantzarik CNA Fagor proiektua bideragarria izan daitekeela. Ez da alarma pizteko unea, horrek ez baikaitu inora eramango. Zuzendaritzaren aldetik argitasun handiagoa falta da, gardentasun handiagoa, konpromiso handiagoa, seriotasun handiagoa".
